Vifaa vya Kikundi Kidogo: Kumsikiliza Roho Mtakatifu

Muhtasari: Kukaa kimya kwa sekunde thelathini au dakika moja kunaonyesha kwamba tunathamini yale ambayo Roho Mtakatifu anataka kutuambia.

Katika mfululizo wa machapisho ya blogu ya “Toolbox,” tutajibu baadhi ya maswali yanayoulizwa mara nyingi kuhusu kuongoza Vikundi Vidogo. Ikiwa una swali ambalo ungependa lijibiwe, tutumie ujumbe!

Ninawezaje kusaidia kikundi changu kidogo kumsikiliza Roho Mtakatifu?

Mwanzoni mwa mikutano yetu, tunaweza kusimulia kisa kifupi cha jinsi tulivyosikiliza Roho Mtakatifu wiki hiyo. Kusimulia mambo ya kawaida yanayotokea kila siku huenda kusionekane kuwa “kisa cha kusimulia.” Lakini nyakati hizi za kila siku hutufanya tutamani kuishi tukiongozwa na Roho, kwa sababu zinatuonyesha kwamba Roho Mtakatifu yuko karibu nasi, si mbali.

Wakati wa kuitikia katika mikutano yetu, tunaweza kutenga muda wa kukaa kimya. Kukaa kimya kwa sekunde thelathini au dakika moja kunaonyesha kwamba tunathamini yale ambayo Roho Mtakatifu anataka kutuambia. Baada ya nyakati hizi za ukimya, tunapaswa kuwa tayari kushiriki kwa maneno rahisi na mafupi mambo ambayo Roho Mtakatifu ametugusa nayo. Tunaonyesha kwa mfano maisha ya kumsikiliza Roho Mtakatifu.

Nifanye nini kuhusu watu wanaozungumzia sana mambo ya kiroho katika kikundi changu kidogo?

Baadhi ya watu wanaweza kuwafanya wengine katika kikundi kidogo waogope kwa kusisitiza sana mambo waliyopitia pamoja na Roho Mtakatifu. Wanaposhiriki, tunaweza kusherehekea kwamba walimsikiliza Roho Mtakatifu na wakaitikia, badala ya kusherehekea yale waliyopitia. Tunaweza kuuliza, “Uliitikiaje Roho Mtakatifu baada ya kukufunulia jambo hilo?” Kwa njia hii, tunathamini ushiriki wao katika kikundi huku tukiwaongoza waelewe zaidi mambo tunayothamini.