Vifaa vya Kikundi Kidogo: Kushughulikia Mawazo Yasiyo Sahihi Kuhusu Mungu na Wokovu

Muhtasari: Tunapomruhusu Roho Mtakatifu azungumze kupitia maandiko, tunadumisha uhusiano na mtu huyo na kutoa nafasi kwa neno la Mungu kurekebisha na kubadilisha mawazo yake.

Katika mfululizo wa machapisho ya blogu ya “Toolbox,” tutajibu baadhi ya maswali yanayoulizwa mara nyingi kuhusu kuongoza Vikundi Vidogo. Ikiwa una swali ambalo ungependa lijibiwe, tutumie ujumbe!

Itakuwaje mtu akielewa vibaya au kutafsiri vibaya kifungu cha Biblia?

Wakati mwingine watu “husoma” katika kifungu jambo walilosikia wengine wakisema au jambo wanalotamani kifungu kiseme. Tunapoona hilo likitokea, tunaweza kutulia na kuepuka kumrekebisha mtu mara moja. Roho Mtakatifu huzungumza kupitia maandiko. Tunaweza kumwongoza mtu kwa upole arudi kwenye kifungu au mstari wa maandiko tunaoujifunza. Tunaweza kusema, “Nimeona kwamba mstari ___ unasema jambo kuhusu hilo. Hebu tuusome tena. Unaona unasema nini?” Tunapomruhusu Roho Mtakatifu azungumze kupitia maandiko, tunadumisha uhusiano na mtu huyo na kutoa nafasi kwa neno la Mungu kurekebisha na kubadilisha mawazo yake.

Huenda tukajiuliza kama tunapaswa kuacha tafsiri isiyo sahihi bila kusema chochote na kuendelea na somo la Biblia. Haya ni baadhi ya maswali ya kutuongoza: “Mawazo ya mtu huyu yanaathiri watu wengine katika kikundi? Je, mtu huyu bado ni mfuasi wa Yesu? Je, mawazo ya mtu huyu yanamzuia kumfuata Yesu?”

Ni vizuri kukumbuka kwamba mtu katika somo letu la Biblia yuko safarini. Kwa hiyo, hatuhitaji kurekebisha kila wazo lisilo sahihi. Mwombe Roho Mtakatifu akusaidie kutambua lipi la kupuuza na lipi la kumsaidia mtu huyo kuelewa.

Zaidi ya yote, ni muhimu kutokuwa na hofu tunapomwongoza mtu kwa upole kwenye maandiko. Kwa njia hii tunampa mtu nafasi ya kuwa na mawazo sahihi kuhusu Mungu na wokovu, ili mawazo yake yasimzuie kukua katika Yesu.