Փոքր խմբի գործիքների տուփ․ վարժվել աղոթելուն

Ամփոփում․ Համոզվեք, որ խմբի անդամները գիտեն՝ պարտադիր չէ երկար աղոթել․ բավական են պարզ, սրտանց աղոթքները։

«Գործիքների տուփ» հոդվածաշարում կպատասխանենք փոքր խմբեր վարելու մասին ամենատարածված հարցերից մի քանիսին։ Եթե հարցեր ունեք, որոնց կուզենայիք պատասխան ստանալ, պարզապես գրեք մեզ։

Ինչպե՞ս աղոթել փոքր խմբերում։

Նոր հավատացյալների համար առաջին կարևոր սովորություններից մեկը աղոթքն է։ Փոքր խմբում սովորելը ոչ միայն ապահով է խմբի փոքր լինելու շնորհիվ, այլև քաջալերող, քանի որ ամեն շաբաթ լսում ենք իրար պատմությունները։ Փոքր խմբերում տարբեր ծագում ու բնավորություն ունեցող մարդիկ են լինում։ Այդ պատճառով աղոթքը պետք է պարզ ու անկաշկանդ պահենք։

Երբ խմբի անդամները պատմեն, թե ինչն է իրենց անհանգստացնում կամ ուժասպառ անում, առաջարկեք, որ յուրաքանչյուրը աղոթի իր աջ (կամ ձախ) կողմում նստած մարդու համար, և հերթով շրջեք։ Համոզվեք, որ խմբի անդամները գիտեն՝ պարտադիր չէ երկար աղոթել․ բավական են պարզ, սրտանց աղոթքները։

Ձեր աղոթքներում խուսափեք «քրիստոնեական» հատուկ բառերից ու արտահայտություններից։ Օրինակ եղեք՝ կարճ աղոթքներ անելով, որոնցով խնդրում եք․ «Օգնիր…», «Առաջնորդիր…», «Հոգա…», «Քաջալերիր…», «Բժշկիր…», «Ազատիր…», «Տուր…»։ Առաջնորդները հեշտությամբ կարող են իրենց աղոթքները «քարոզների» կամ երկար խոսքերի վերածել, որովհետև շատ բան են ապրել Աստծո հետ և շատ բան են սովորել Նրա մասին։ Բայց փոքր խմբերի համար ավելի օգտակար է լսել, թե ինչպես է իրենց առաջնորդը պարզապես Աստծուց օգնություն խնդրում։ Այսպիսի աղոթքները հեշտ է կրկնել։

Փոքր խմբերում աղոթքն ավելի խորացնելու ձևերից մեկը աղոթելիս Սուրբ Գիրքն օգտագործելն է։ Կարևոր է աղոթքում օգտագործել այն հատվածների խոսքերը, որոնք խումբն ուսումնասիրել է նախորդ հանդիպումներին։ Մարդիկ կճանաչեն այդ խոսքերը և ավելի խոր կապ կհաստատեն Աստծո, Սուրբ Հոգու և Սուրբ Գրքի հետ։

Իսկ եթե մարդիկ ամաչում են բարձրաձայն աղոթելո՞ւց։

Եթե նրանց համար դժվար է բարձրաձայն աղոթել, թող միևնույն է լուռ աղոթեն։ Երբ նրանց հերթը հասնի, ժամանակ տվեք, ապա շարունակեք, երբ ասեն՝ «ամեն»։ Կարելի է ակնկալել, որ ինչ-որ մեկի լուռ աղոթքի ժամանակ Աստծո ներկայությունը զորավոր կերպով կզգացվի։ Այդ մասին ասեք նրան և խմբին, որպեսզի ամաչկոտ աղոթողը իմանա, որ իր աղոթքները կարևոր են։

Աստվածաշունչ ուսումնասիրող խմբերը փոքր պահելը նաև թեթևացնում է ամաչկոտ մարդկանց լարվածությունը։ Եթե խմբում ընդամենը մի քանի մարդ լինի, նրանք գուցե ավելի պատրաստ լինեն բարձրաձայն աղոթելու։ Ժամանակ առ ժամանակ հարցրեք ամաչկոտ մարդուն՝ պատրա՞ստ է բարձրաձայն աղոթել։ Իսկ մինչ այդ քաջալերեք նրան տանը, մենակ եղած ժամանակ, բարձրաձայն աղոթել, որպեսզի սովորի աղոթելիս իր ձայնը լսել։

Հիշեք՝ աղոթքը սովորություն է, ուստի պետք է աղոթելով սովորել։