ԴՆԹ․ Ավետարան

Ամփոփում․ Ավետարանն այն առանցքն է, որի շուրջ առողջ միկրոեկեղեցին պտտվում ու թափ է հավաքում։

Աշակերտներ պատրաստող շարժումները ավետարանը պահում են իրենց պատգամի, գործելակերպի, հոգևոր ձևավորման և տեսլականի կենտրոնում։

Երբ ավետարանը պահում ենք կենտրոնում, պաշտպանում ենք մեզ եսակենտրոն եկեղեցի դառնալուց և դառնում ենք առաքելության վրա կենտրոնացած եկեղեցի։ Անհատապաշտությունը փշրվում է Աստծո առաքելության ծանրության տակ։ Եվ ոչինչ այնքան չի ձևավորում մեզ, որքան ավետարանն այն աշխարհի հետ խոնարհաբար կիսելու պատրաստակամությունը, որը հաճախ մերժում է այն։

Երբ ավետարանը պահում ենք կենտրոնում, համագործակցում ենք երկրի վրա Սուրբ Հոգու գլխավոր նպատակի հետ՝ յուրաքանչյուր հավատացյալի մեջ ու նրա միջոցով Հիսուսին բացահայտելու։ Սուրբ Հոգին պատրաստակամորեն հաստատում է մեր պատգամը՝ համարձակություն, նշաններ ու հրաշքներ տալով։ Մենք մտերիմ ենք Նրա հետ, հետևում ենք Նրա առաջնորդությանը և աղաղակում, որ մի սերունդ ու մշակույթ փոխվեն Բարի լուրի միջոցով։

Երբ ավետարանը պահում ենք կենտրոնում, վերացնում ենք «աշխարհիկների ու հոգևորականների» միջև եղած հեռավորությունը։ Բոլոր հավատացյալների քահանայությունը դառնում է սովորական, և յուրաքանչյուր հավատացյալի՝ անկախ կոչումից կամ աշխատանքից, հիշեցվում է ավետարանով կիսվելու իր պատասխանատվության մասին։ Ավետարանը բոլորին հավասարեցնում է։ Առաջնորդներին հիշեցվում է, որ պետք է ավետարանով կիսվեն ոչ միայն բեմերից, այլև աշխատանքի վայրում, ընկերների ու ընտանիքի հետ։ Եկեղեցի հաճախողներին հիշեցվում է, որ մարդուն եկեղեցի բերելն, ինչքան էլ որ կարևոր քայլ լինի նրա ճանապարհին, դեռ ավետարանով կիսվել չէ։ Հավատացյալը պետք է ավետարանը փոխանցի իր շրջապատում, որտեղ ազդեցություն ունի, և համարձակորեն՝ նաև այնտեղ, որտեղ ազդեցություն չունի։

Երբ ավետարանը պահում ենք կենտրոնում, վերացնում ենք մեր եկեղեցում անտեսված մարդկանց առաջ ծառացած խոչընդոտները։ Ուզում ենք, որ ավետարանը լսվի ամենուր։ Ուստի մեր խոսքերով ու գործերով ցույց ենք տալիս, որ ցանկացած մարդ կարող է կիսվել ավետարանով՝ անկախ սեռից, կրթությունից կամ հասարակական դիրքից։ Երբ ավետարանն է կենտրոնում, մշակութային ու հասարակական նախապաշարմունքները կորցնում են իրենց ուժը Աստծո առաքելության մեծ իրականության առաջ։